+7 (777) 001 44 99
Қазақша
Русский
English
Медицина қызметкерлері, полицейлер, жүкті әйелдер, балалар және COVID-19 вирусын жұқтырғандармен байланыста болғандар коронавирусты анықтау тестінен тегін өте алады. Бұл туралы Нұр-Сұлтан қаласы қоғамдық денсаулық сақтау басқармасының басшысы Сәуле Қисықова айтты, деп хабарлайды Tengrinews.kz тілшісі.
"Коронавирус инфекциясын жұқтырған адаммен байланыста болғандар, жүкті әйелдер, балалар тегін тексеріле алады. Қазір таңда профилактикалық жұмыстарды жүргізіп жатырмыз. Осыған байланысты медициналық қызметкерлер, полиция мен блокбекеттегі азаматтар тексеріледі", - деді Сәуле Қисықова.
Сондай-ақ, ол астаналықтар медициналық тексерісті қайдан өте алатынын айтты.
"Жедел респираторлық вирус инфекциясын жұқтырғандар елордадағы №2 емханада тегін қарала алады. Ал №6 және №9 поликлиникада провизорлық емхана ашып қойдық. Онда Нұр-Сұлтанға ем алуға келген науқастар мен қала тұрғындары, жүкті әйелдер ауруханаға жатқызылмас бұрын осы емханаларда міндетті түрде мединалық тексерістен өтеді", - деді денсаулық сақтау басқармасының басшысы.
Сонымен қатар, Сәуле Қисықова жекеменшік зертханада коронавирусты анықтауға тексерілу қызметінің құны қанша болатынын атап өтті.
"Алматымен әуе жолы ашылды. Осыған байланысты тұрғындар міндетті түрде тексерістен өтуі керек. Қалада бірнеше зертхана орталығы бар. Олар бағаны өзі белгілейді. Мұнда тест тапсырудың ақысы 11-20 мың теңге аралығында", - деді ол.
Айта кетейік, елімізде коронавирус жұқтырғандардың саны 3273-ке жетті. 829 науқас жазылды, 25 адам қайтыс болды.
